Christiana dream one kind dream last night. Since her mama born am, she don use her eye see different different things for this life wey she never ever talk about, but that was not until yesterday when she use her two legs waka go meet Aunty Counsellor, come open her mouth like pipe wey don burst out water full everywhere.
Inside the dream, person call Ranti, Christiana best friend for this world wey we dey so, tell Ranti say she see where them carry Christiana gist on top WhatsApp group chat, unto say as breeze blow fowl yansh don open and na Christiana be the fowl. Christiana no remember who call Ranti but she know say na Ranti tell am say her story don enter town brekete. Fear catch am.
Christiana jump up from sleep! She wipe her eyes make she dey see clearly. Her mind come dey follow her talk say, inside this Lagos? If people ever know the kind things wey Ranti say dem dey discuss about her for inside the dream? Her own don finish be that na. She dey suspect Aunty Counsellor even though she no tell am the things Ranti talk say those people for the WhatsApp don know about. Even Ranti sef no know those details about her life, upon how dem be like five and six.
Her secrets plenty no be small. She dey fear say na Bobo, her pikin wey never reach six years old, go suffer pass if people ever know about the kind life wey she don live. Christiana no dey fear before because she know say if na in those days when na only she dey, wahala no for dey because, she for don brush anybody wey wan use her eye see dutty but now wey she don born Bobo she no fit do some kind things again. How e go take affect Bobo life for outside? Na the question she come dey always ask herself before she do anything.
Wetin sef? E no get anybody for this life wey holy pass! Na the quarrel wey enter Christiana chest be that. Make anybody come meet me if him know say e no get secret for this world, if all of them talk say they never do anything bad before, make them come face me, water dey comot from Christiana eye as she dey for bed. She dey think am, say if people gather somewhere dey judge am, even if say na for inside dream e take happen, say e must to mean something. Christiana dey confused as to whether or not she go carry this dream go meet Aunty Counsellor, she fit help her understand wetin dey happen to her.
Ah, Bobo don wake.
Bobo enter Christiana bedroom, sidon for corner of the mattress dey look him mama like person wey miss road, sleep still full him eye. Bobo how now? You no fit greet your mama? Christiana ask her pikin. Bobo turn him head face the mirror she hang for the other side of the room, he dey still like wooden image, Bobo no be you I dey talk to? Christiana ask am again. Bobo turn around look him mama for eye, he open mouth and the thing wey follow send electric shock straight to Christiana spinal cord. Bobo ask him mama, wetin dem talk?